Beste Manluu en vrouwluu,

door

Jannegien

 t Jonge, tjonge, al weer een maond veurbie, ie’j vraog oew tog of waor blif de tied. Ja allemaole bie de andere an. Das een waorheid as een koe mar ik vinne dat’t mar gluunig had giet. Het liek wel of ze de daage stiekum korter maak, vrogger in Wiessel leeken die veule langer, veural ar’j op ’t eer appelland of ’t roggeland an ’t waark waarn. Dan was iej blie’j as ’t koffie of theetied was, dan kon ie’j effies uutrussen. In huus haj ok nog ut een en ander te doen, dus het was hard waarken, weant ie’j mossen oew hande gebruiken, ie hadden gien stofzuuger, gien wasmesiene, gien gas, gien waterleiding en ok gien geiser, ‘s winters kook ’n op t fennus en zomer op ’t petereulie stel ie’j mossen um 10 uur beginnen ai’j  umme 12 uur wollen ééten.

Toch kiek ik tevreente op die tied trugge wiele leeven veule rustiger. De radio (ai’j die al hadden) was allenig ’s avonds an, wie waaren zuunig op aales dus ok op   stroom, ie’j heuren dus ok niet zo veule narigheid. Zaoterdags gingen onze vente vrog in de teil en dan moggen zie bie de buuren(die ’t beeter konnen doen) nao ’t kiender programma op de tv kieken mit alle buur kinder op de grond veur de zwat wit televisie, door keeken ze de hele weeke no uut niks compoeter mit gekke, geweldodige spellegies.

Wij hadden toen ok al veugelties en Zaoterdags mossen alle hokken schoone eu  maak worden, ’t zand uut eu zeef de baksies of eu wassen de ramen eu wassen en de gang van ’t hok eu vei-eld (dweilt). Dan zatten onze veugelties der ok op z’n Zundags bie. Zie waren ons dan ok dankbaar veur al die zurgen, zie fluiten ons de oorn van de kop, zie wannen ok nog vaake goeie priezen ok. Deuzen vol mooie béékers staot nog in de baarging, as uule der wat wilt dan kom ie ma.

Dan mos ter buuten nog eu haark en eu véég worren zo da’j konnen zien dat ’t Zundag was. En wie hadden wat te haarken, een lange op rie’j laan eu zomers alle paadjes tussen de gruunte bedden, mar dan was’t ok mooi um te zien, mo’j noew is kieken bie sommege hoffie’s,’t is bar en boos, een stukssien zo groot as een bedde laaken en het onkruud en ’t gres tut an de vensterbanke. Iederene mot’t ok zelf weeten maar Apeldoorne giet in dat op zich der niet op veuruut.

Genog eu zeurt, holt oe goed beste mensies, alle zieken beeterschap en staarkte.

De kweekers en sters goei kweek eu met ze praoten he.

Vr. gr.Jannegien uut de Maoten.

Jannegien noemde jullie dat nou altijd:”die goede oude tijd?”

Ik begrijp dat niet, hoe kan je nou leven zonder gas, water, stofzuiger, t.v. en computer.

Ik vindt het wel goed van je dat je altijd meehielp met het schoonmaken van de hokken. Ik heb het er met Lenie overgehad, maar ben daar nog niet helemaal uit.

Nog bedankt voor je uitleg over dat “heikneuteren”, ik snap alleen niet dat je daar niet verkouden van werd.

Tot de volgende keer,

Kees uit 7 huizen.